Aicí anam fèr una passejada al mièg de mòts esparricats. Escapats de l'òrdre alfabetic del diccionari, dins una totala libertat, son defòra jol solelh o la pluèja, sietats ont que siá, e nosaus anam partejar lor musica, lor vida, lor memòria, mès soventis còps aquelis mòts son tan pastats d'uman que se senten pas pro fòrts per parlar de l'òme.
Joan-Baptista Fournié es nescut en 1938 a Amplanh (Arièja) ont les sieus èran païsans. Ara viu en Normandia ont fèc regent mès, un còp l'an, torna venir popar l'aire del país.
Aquel es lo siu seten libre en occitan del país de Foish.
Aicí anatz trobar unis mòts arrapats tanlèu escapats de la gòrja d'un païsan en esclòps o de la d'una vièlha menina arrucada al canton. Èra dins un temps ont las gents prenián le temps de parlar, ont la novèlas, d'aurelha en aurelha fasián le torn del mond. Urós temps, quand les vièlhs, dins la vrespada anavan portar lor codena suls bancs de la plaça en seguent l'ombra e le solelh, l'un racontava, l'autre bargalhava. Urós temps, quand las femnas anavan emplenar la dorna a la font, l'una charrava, l'autra barjacava. Fèr la rasonada ont se parla de tot e de res, ont un mòt fa nèisser l'autre, ont de la craba se passa al perièr, ont les rires sièguen las rondinadas, es aprofitar del plaser qu'espelís dels mòts, es viure. D'aquelis mòts de cada jorn que de gòrja en gòrja vòlan e de còr en còr van, ne trobaretz qualques unis qu'esparriquèi, cossí que siá, sus pajas blancas, en pensant al temps ont amb d'una foissina de doás piás esparricava les rengs d'èrba al solelh dins les prats... (tròç de l'Avant-prepaus).
Joan-Baptista Fournié es nescut en 1938 a Amplanh (Arièja) ont les sieus èran païsans. Ara viu en Normandia ont fèc regent mès, un còp l'an, tornava venir popar l'aire del país. A dejà fèit paréisser mantuns libres en occitan del País de Foish que siá de teatre, de contes e de novèlas.
Nouveau livre de Joan-Baptista Fournié, en occitan du Pays de Foix : en quelque sorte l'équivalent d'un dictionnaire amoureux des mots occitans et de la langue d'oc...
